Maingay ang mga bata.

Maingay ang mga bata tuwing umaga. Sasakay lang ng school service, ang dami pang satsat. Kesyo naiwan si ganito at nakakaasar si ganyan at nang-agaw ng upuan sa harapan si kuwan. Nagigising ako nang di oras.

Sinara ko ang bintana.

Maingay ang mga bata tuwing tanghali. Time na para pilitin sila ng mga yaya na kumain ng tanghalian pero ang dami pang satsat. Nanonood pa kasi sila ng cartoons. Di makanood si yaya ng Sis. Sarap sarap pa naman ng ulam.

Nilakasan ko ang volume ng speakers ko. 2NE1 ang pinapatugtog ko.

Maingay ang mga bata tuwing hapon. Play time. Naghahabulan. Nagtatawanan. Nagsisigawan. Nagkakapikunan. Nag-iiyakan. Nagsisiuwian pero madami pa ring satsat. Di na daw sila bati ni kuwan at di na niya papahiramin si ganito ng ganyan kahit kailan. Sabay sisigaw ang mga nanay na pumasok na ng bahay dahil luto na ang hapunan.

Tahimik na ang kapaligiran.

“Sa may bahay na aming bati

Meri krismas na magluwalati.

Ang shimeser vvvvmmmmm hmmm… nananana…

yayanana manini miran PASKO LAGI!”

“NAMAMASKO POOOOOOOOOO!!!!!”

KABLAAAAG!

Sana walang naipit sa paghampas ko ng pintuan.